Hard en sag, is die lewe…..
Versigtig. Soms is dit ‘n fantastiese woord. As jy sorg dat geen ongeluk gebeur nie, is dit mooi. Dit wys jy’t ‘n goeie hoop waarde vir jouself en jy gee genoeg vir iemand of iets anders om, om beskermend te wees. Voorkomend amper. Jy respekteer. As jy egter ‘n jammer-dat-ek-leef mentaliteit het en meer kere as nie bang is, dan voel middelmatigheid meer gepas as braaf. Niemand sê jy moet oor kole sprint nie, maar soms reken ek jy moet braaf genoeg wees om ‘n kans te vat. Dobbel met gelukkig wees want dis meer verslawend as om ‘n 50c in ‘n masjien te gooi en nooit weer te sien nie. Kry eerder op ‘n eerlike manier verskriklik seer, leer en pasop dan vir dieselfde ou koeie storie wat wéér gebeur.
As jy dink jy kan deur die strate van die lewe wandel sonder dat iemand ‘n verwagting van jou gaan hê, is jy onder ‘n vrot illusie. Die melk is suur en die slaaiblare bruin. Jy’s nie ‘n spook nie. Nog minder ‘n engel. Jy’s iemand met ‘n naam en ‘n van. En die feit dat jy nog sooibrand kry, die tax deadline moet haal ‘n puisie laat ontplof waaraan jy nooit moes raak nie en in PicknPay se ry moet staan, maak jou nog een van die gepeupel. Die volk. Of jy nou bekend is of nie, jy’t ‘n verantwoordelikheid. Jy kan nog dink hier hoef jy nie rekenskap te gee vir jou familie of jou vriende wie jou onvoorwaardelik voorwaardelik liefhet nie, maar Eendag gaan jy gestroop wees van hoe jy nou lyk, wat jy doen, wat jy sê, hoe dit alles gebeur en die kak manier hoe jy dit soms wil regverdig en verdedig.
Soms hou ‘n mens meer van mense as hulle van jou hou. Rondom ander weet jy voor jou heilige siel jy wil nooit in ‘n hysbak oppad na die ewigheid toe vassit nie al respekteer jy daai een se keuses of definisies wat jy nie verstaan nie. Hoekom skop mense so vas teen dit wat anders is? Ja dis dalk vreemd, die oorblywende van ‘n paar, iets wat volgende kom… maar dis ook net verskillend en om iets te onderskei van die gewone. Is dit nie verrykend nie? Is dit nie bevrydend om te weet jy gaan nooit aangesig tot aangesig stry met iemand wat net soos jy is nie? Hel, dit sou op die langste hofsaak uitloop in die geskiedenis van ons tyd.
Partykeer moet ‘n mens dalk net ligter loop, maar loop moet jy loop. Vorentoe is ‘n baie beter bestemming as parallel parkering sonder kragstuur. Miskien is die antwoord soms om op te staan en jou intensie oor of vir ‘n saak te evalueer. En as jy vrede het oor ‘n ding is dit net eintlik die geval as iemand anders daarvoor vrede voel en jy jou glimlag of vreemde sin vir humor behou.
- In Saterdag se ‘By’ is die Die A tot Z van besparing raakgelees en my eie A tot Z van lokvalle wat jou voorspoed kan kelder, identifiseer.
Advies as die deler meer belangstel in wat jy verloor as wat jy wen.
Basaar omdat jy selde iets daar koop wat jy weer gaan gebruik.
Chloor want dit maak jou oë rooi.
Duur as dit die prys is wat jy kies om te betaal.
Ego as jy besitlik raak met jou seer.
Flirt as jy nie reg is vir die gevolge nie. Geld as jy na dit as rykdom verwys.
Hard as jy op iemand se hart trap.
Idioot as jy jou konstant tussen ander sulkes, omring.
Jammer as dit nie jy was wat dit hoef te sê nie.
Katkisasie as jy dit bywoon omdat jy moet en nie wil nie.
Lêpel-lê as dit nie veilig is nie. Miskyk as jy blind is vir wat reg voor of langs jou is. Negatief as dit is wat jy eerste verwag.
Onderskep as jy dit met iemand anders se droom doen.
Passie as dit na oombliklike begeerte en nie dryfkrag wat langer hou, verwys nie. Waarvoor
Q staan, weet ek nie.
Reserwe as jy glo dis die trui wat jou naam op het.
Seks as dit oor lus meer as liefde gaan.
Teëpraat as jy verkeerd was.
Uitskakel as jy self nie weet of jy binne of buite hoort nie.
Vergeet as jy dit aspris doen.
Wedstryd as die wen vir jou belangriker is as die stryd.
X-strale as jy iemand ken wie se lewe tans van die uitslag afhang.
Zoem as dit ‘n muskiet is wat jou uit die slaap hou en die Doom op is.
Saggies. Dis tans vir my ‘n beter woord as versigtig. Ek praat nou die dag met ‘n vriendin wat Drama geswot het en ek stem heelhartig met haar saam toe sy sê na dit alles het jy geweet jy kan hard praat, maar wat nou? In dit, is vir my ‘n mooi les opgesluit. Soms skommel die lewe jou meer as wat jy voel jou maag kan vat. Jy onthou jy gaan weer hard kan praat terwyl jy oppad soontoe dalk saggies moet dankie sê dat jy nie weet HOE jy daar gaan uitkom nie.
Nie jou verlang, jou seer, jou alleen, jou kwaad of jou geluk kan wegraak nie want iewers tussen alles hard en alles saggies, gebeur die lewe.
Dankie Liani!
Onlangse Kommentaar